رساااااااااااالة من ام الى ابنها الشهيد...بتقطع لقلب....

رسالة من أم لإبنها الشهيد..

يا أمي لو تعرف كيف صار حالنا من بعدك ياحبيبي
يا أمي بعرف أنك مامتت لأنو هيك صارو يقولو رفقاتك وهنن حاملينك على كتافون
بتعرف شو يا أمي ؟
أبوك ماعاد يقلك ليش اتأخرت وحتى ماعندو مشكلة تدخن سكاير قدامو.. ايه يا أمي صدقني وغلاوتك عندي ماعندو مشكلة لأنو انكسر على غيابك ياعمري..
المرة الماضية نزل هو وعمك عالسوق وكبرو صورتك وعلقناها مكان صورة جدك.. تقبر قلبي على هل شبوبية ماأحلاها..
يا أمي في وحدة حلوة اجت لعنا عل بيت وقالت أنو كنتو تحبو بعضكون , ضميتا وصرنا نبكي نحنا التنين..
بس قلتلا وقلت لكل الناس أنو ابني يمكن يتأخر بس رح يرجع.. مو هيك يا أمي ؟
بعدين بس ترجع رح أعملك كل الأكلات اللي بتحبا.. بتتذكر كيف وقت بكون عم اطبخ تروح تاكل من الأكل وهو عل نار وكنت قلك شيل ايدك واستنا لحتى يصير ويجي أبوك..
يا أمي كل يوم عم أعمل غرفتك متل ماكنت تتركا مشان ارجع رتبا..
ياأمي لاتزعل مني بس عم ضم وشم تيابك وأبكي.. أبكي.. أبكي.. بس والله وقت اللي بتخيلك أنك صرت جنبي عم أمسح دموعي بسرعة قبل ماتشوفني يا تقبرني..
يا أمي الله يرضى عليك لاتتأخر عم استناك..
نسيت قلك شغلة رح تفرحك من كم يوم سمعت من ولاد خالتك أنو فاز برشلونة بس على مين والله مابعرف بس اللي فهمتو أنو مباراة مهمة..
بدك شي ياعيون أمك.. انتبه على حالك ياحبيبي.. بعرف أنك لسه موجود لأنو وعدتني ماتتركني.. ومتأكدة أنك رح ترحع بيوم من الأيام وتدق الباب..

( أمك )

شكرا لك للمساهمه