يا حبيبي فيق .للشاعر الزجلي الكبير طليع حمدان

يا حبيبي فيق

يا حبيبي فيق ،
شو مغفيك ؟ ..
من أول الليل ،
وأنا بناديك ،
سهرتني ،
عا لحافك الغفيان ،
لا كنت أغفى ،
ولا قدرت وعيك !..

إرحم جفوني ،
يا قمر نيسان ! ..
حاجي دخيلك نوم ،
بيكفيك ..
جايي الربيع ،
يشوفنا عرسان ،
بتقبل يجي ها الضيف ،
ما يلاقيك ؟ ..

وآذار نقطني إلي ،
بفستان ،
و جاب لك قميص ،
و راكض يهنيك ..
ونيسان ،
فيي نقز الرمان ،
و الكوز ، فقا الكوز ،
تا يطعميك !..

و بعدك ،
إنت يا صاحب البستان ،
زعلان ،
ما بدك حدا يحاكيك ..
بكيت ،
جفن العاشق الدبلان ،
و ما بتسألو ،
مين العم يبكيك ؟..
بدعي عا جسمي ،
المثل غصن البان ،
ما يعود يلوي ،
انما رجع يلويك ..
و خدي ،
القطف من مبسمك ألوان ،
ريتو يدوب ،
انكان ما بيوفيك !..
وتمي اللي عم يرشح ندي ،
وعرقان ،
يا يحترق ،
يا يرجع يطفيك ،
سقيتك عطر منو ،
و إنت عطشان ،
و بعدني :
كلما عطشت بسقيك !..
دخلك حبيبي ،
انكان بالإمكان ،
رجعلك زيارة ،
وشو إلك ، بعطيك ،
تا شوفك ،
عا فراشك السهيان ،
و عالشرشف المحروق ،
تا يغطيك ..
و طقمك ،
معلق مطرحو ، بردان ،
ما بيدفا ،
غير تايدفيك ..
عم شمشمو ،
و قلو : من الحرمان ،
اكويني ، العمر ،
صار لي عمر بكويك ..
وعم بوس ،
شبابيك الجيران ،
تا شم فيهن ،
آخر لياليك ..
و و ين رح شوفك ،
بعد سهران ،
وما في بحيط المقبرة ،
شبابيك ،
ما ضل عندي ،
غير كلمة : كان،
وحتى تخبيني ،
وأنا خبيك ،
قوم ،
حاجي بها القبر غرقان ،
خلي عيوني تقبرك فيي ،
و خلي عيونك يقبروني فيك


:jgd:

الغالي بو عاهد الله يسلم ايديك على ما نقلت للمبدع طليع حمدان

شاعرنا الزجلي المحبوب الله يطول عمره ..مشكور كل الشكر وانا

ايضا اهديك هذه القصيده لشاعرنا الكبير طليع حمدان تقول :

:gfd:

مبارح متل هلق

مبارح متل هلّق سوا كنّا ....وكان الورد فينا وطلع منّا

وتمو التحنّا بخمرك المعصور ....جايي عَا بالو اليوم يتحنّا

ضيّعت صوتي بصوتك المسحور ...لما سوا إحساسنا تغنّا

متل السوا سمعو غناني طيور .....وما بيعرفو مينو القبل غنّا

ملتي عليي خصر صرنا خصور ......وشفي جنا عاشفة الجنّا

وكل ما شربت من جدول المنتور .....قلو بعد ويقول بتمنّا

كان الهنا ما زارنا من شهور ......وكان فينا بعد نتهنّا

بكير لحظات اللقا المحرور ......خلصو تَا فلينا غصب عنّا

وفَلّ يوم مبارح ومقهور ......ليش دخلك فَلّ يتأنا

إلنَا بَنَى بيت بزهر وعطور ..... واليوم راح البيت والبنّا

بكرا تعي دموع الربيع نزور .... يما مع شفافك يجو لعنّا

يعصرهن علينا صباح النور .... ومع بعضنا من جديد يعجنّا

والحب يخبرنا على تنور ..... عَا آخرو نزدلو حرف منّا

تَا يصير تنوره ملاني زهور ..... كنا سوا فيها أنا وإنتي

ومعها رجعنا متل ما كنا


:hdhk: :erer: :KFY:

راااااااااااااااااااااااااااااااااااااااائع احسااان

جميل مانقلت شعر زجلي متميز

بس في شغلة اولها ذكرتني بمسلسل خربة فيق ياتوفيق يا توفيق فيق ههههههههههههههههههههههههه

نايم حبييي من النسمات خايفي يفيق

هربي يا نسمه لا دغدغي عيونو

اعدت التميز في الاختيار حفظك االله ورعاك

---------------ابو عاهد ---------------ارام :gfd:

الاعزاء حفظكم اللة.
ابو اياد
نادو
ارام
اشكر مروركم الرائع وبصمتكم المشرفة على صفحتي
ودمتم سالمين
مع خالص احترامي وتقديري :jgd:

احسااان تقبل مروري بشعر للشاعر الكبير موسى زغيب


سهران
وحدي..والقلم حدّي
يغافل شرودي و يسرق الردة
والصبح
تا يفيّق مرج أخضر
قصقص تياب الليل تا تقصر
والليل بيفلّ..تا يندي

وحدي و شتي و ليل و صلا و شموع
سهران..بين القافية و الحرف
اكتب و امحي اسمها الموجوع
للمرة العشرين..بعد الألف

حسيّت صرلي شي سنة وأكتر
ما لقي خدّي عالمخدّة
وشمع العاضوّو..كنت عم بسهر
اصفر لونو من السهر قدّي
سألتو..نسي ما عاد يتذكر
ان كنّي أخدت خدّو
يما أخد خدّي

ووصلِت لعندي مرنخة من الطوف
الطوف..المِحي دعسات ماضيها
وبعينها..مَرقو السهر و الخوف
و دشّرو لون التعب فيها

وبلّش يقلّي عقدها المرمر
بتحب؟؟
قلت الحب من ربّي

قالت..الما بيحب ما بيسهر
وليلك سهر لا تجرّب تخبّي
قلت..شِعري ..و شَعرِك الأشقر
اختصرو الدني..و تملكو حبّي

بسهر عا بيت الشعر تا يشفا
وعا وعد شعرِك تايجي لحدّي
وبينك..وبين الشعر ما بغفا
بس القهرني..خلصت المدّة
ورح تهرب الأيام من يدّي

ولا قدرت حبّو
قد ما بدّو
و لا قدرت حبّك..
قد مابدّي

اللة عليكي يا نادو رائعة .
الشاعر موسى زغيب ابو ربيع عملاق في الزجل .
واسمحي لي ان ابادلك الشكر بالشكر بقصيدة لزغلول الدامور وغناها نصري شمس الدين
.. وتقول:
“بكّير غديو ع الكرم بكّير
عصفورتين مغنّجين كتير
عميكرجوا كرج الحجل ع الأرض
والأرض عم تحملن وتطير
وصدفة أنا بنهارها بالذات
غادي وع كتفي الجفت والدبقات
رايح تا إتصيّد بهالكرمات
هيدا نصيبي وهيك بدّو يصير
راقبتن وهنّي ما قشعوني
مشيوا ووراهن مشيت عيوني
حتى وصلت ع كعب زيتوني
صليت الجفت ولطيت خلف الشير
وضلّيت زور الكرم ع يومين
تا اكمشت عصفورة من التنتين
وفلّتها بين القلب والعين
وكرامة نعومة جوانحها
يحرم عليي كمّش عصافير
مع تحياتي وشكري
:jgd: :gfd:

الغالي اخي ابو رامي.
يا لروعة وجمال ما اضفتة من جمال .


القطف من مبسمك ألوان ،
ريتو يدوب ،
انكان ما بيوفيك !..
وتمي اللي عم يرشح ندي ،
وعرقان ،
يا يحترق ،
يا يرجع يطفيك ،
سقيتك عطر منو ،
و إنت عطشان ،
و بعدني :
كلما عطشت بسقيك
دائما انت راقي ومبدع في ردودك وفي كل ما تقدمة من روائع اخي.
زينت صفحتي وتركت بصمة جميلة وثمينة.
مع حبي واحترامي اخي الغالي ابو رامي :gfd: :jgd: :JKKK:

رااااااااااااااااائع يا احسااااان

لا يوجد رد بعد كلامك وانتقاءك الرائع المتميز

الرائعة الاخت وردي.
مرورك اسعدني شكرا لك .
مع خالص احترامي وتقديري :gfd: :jgd: :YRE: